Mustafa e Lunacek flasin për njohjen e Kosovës nga 5 vendet e mbetura të BE-së
RajoniPress
15:59, 20 Prill, 2015
Kryeministri i Republikës së Kosovës, Isa Mustafa, ka pritur sot në takim europarlamentaren Ulrike Lunacek.Siç bëhet e ditur në njoftimin e Kryeministrisë, kryeministri Mustafa e njoftoi për progresin e vazhdueshëm që po arrihet në Kosovë.
Sipas njoftimit, Mustafa e ka njoftuar atë rreth prioriteteve të Qeverisë së Kosovës, që kanë për qëllim zhvillimin e qëndrueshëm ekonomik, punësimin dhe mirëqenien, sundimin e ligjit dhe shtetin ligjor, luftën kundër krimit të organizuar dhe korrupsionit, agjendën evropiane, reformat thelbësore në arsim dhe në shëndetësinë bashkëkohore.
“Kryeministri Mustafa theksoi përkushtimin e fuqishëm të Qeverisë së Kosovës në proceset euro integruese. Kryeministri po ashtu veçoi rëndësinë që ka për Kosovën nënshkrimi i Marrëveshjes së Stabilizim Asociimit dhe nevojën për liberalizimin e vizave për qytetarët e Kosovës”, shtohet më tej në njoftim.
Europarlamentarja Ulrike Lunacek vlerësoi progresin në Kosovë, duke shprehur përkrahjen e saj të mëtutjeshme për Kosovën.
“Kryeministri Mustafa dhe europarlamentarja Lunacek biseduan edhe për proceset që lidhen me njohjen e Kosovës nga 5 vendet e mbetura të BE-së, përafrimin e Kosovës me ligjet dhe me standardet e BE-së, si dhe tema të tjera të rëndësishme”, përfundohet në njoftimin e Kryeministrisë.
