Nafta jocilësore po i shkatërron automjetet

Afrim Maksutajt, nga Radavci i Pejës, i është djegur vetura e tipit BMW e prodhuar në vitin 2005, siç thotë ai, për shkak të naftës jocilësore që është furnizuar në pikat e karburantit.

“Automjeti filloi të nxehet shumë dhe pas pak minutash nisi t’i dalë flaka”, sqaron Maksutaj, duke shtuar se pas konsultave që i ka pasur me disa mekanikë të njohur të automjeteve, këta të fundit kanë konstatuar se djegia e automjetit ka ndodhur për shkak të cilësisë së dobët të naftës. “Nafta e cilësisë së dobët ka shkaktuar nxehjen e motorit dhe si pasojë e kësaj është shkaktuar flaka”, tha Maksutaj.

Edhe Valon Gashi, nga Prishtina, thotë për “Zërin” se shpeshherë detyrohet veturën e tij të tipit “Opel Corsa” ta dërgojë në servis, kryesisht për shkak të cilësisë së ulët të derivateve që shiten në vend.

“Filtrin e naftës duhet ta ndërroj 3 herë gjatë vitit. Para një muaji kur e kam ndërruar filtrin ishte nxirë nga nafta e keqe”, tha Gashi, duke shtuar se përveç filtrit të automjetit të tij i ishte dëmtuar edhe pompa e shtypjes së presionit të lartë të naftës, e cila kushton shtrenjtë.

Lumjan Hashani, po ashtu nga komuna e Prishtinës, i cili vozit një veturë të vitit 1968, ankohet për cilësinë e dobët të derivateve në tregun e Kosovës. “Po, kam shumë vështirësi me automjetin tim, i cili është ‘old-timer’”. Për shkak të naftës së keqe po prishet shumë shpesh e sa herë po e dërgoj te mekaniku më thotë se prishjet janë pasojë e naftës së keqe”, tregon ai.

Flamur Mehani, automekanik, sqaron se shumë qytetarë janë ankuar për defekte në automjete, kryesisht gjatë sezonit të dimrit. “Gjatë sezonit dimëror dizelit në Kosovë po i shtohet vajguri që kushton 1 euro për litër”, thotë Mehani. Sipas tij, nëse vajguri i shtohet naftës në masë të madhe krijon papastërti dhe shkakton prishjen e pjesëve të automjetit. Servisimi i rregullt i një automjeti në Kosovë arrin deri në 160 euro, duke përfshirë ndërrimin e vajit motorik, filtrin e vajit, filtrin e klimës, filtrin e ajrit. Rregullimi i pompës së rezervuarit kushton 200 deri në 250 euro, ndërsa rregullimi i filtrit të naftës kushton 80 deri në 160 euro.

Në territorin e Kosovës janë të licencuar 5 laboratorë, të cilët bëjnë analiza për të vlerësuar cilësinë e derivateve, ndonëse vetëm 3% e të gjitha karburanteve të importuara u nënshtrohen këtyre procedurave.

Se cilësia e naftës që shitet në vend është jokonform me parametrat e caktuara e dëshmojnë edhe mostrat, të cilat Inspektorati i Tregut në bashkëpunim me trupat inspektuese të autorizuara nga Ministria e Tregtisë dhe e Industrisë kanë marrë gjatë vitit 2014. “Nga 570 mostra të testuara, të cilat i kemi marrë nga pikat e karburanteve, 114 prej tyre kanë rezultuar të jenë jokonform me parametrat e përcaktuara”, bëjnë të ditur burime nga MTI-ja.