VV: Përmbytjet vazhdojnë, institucionet komunale të papërgatitura

Viti – Pavarësisht kushteve të favorshme të tokës që ka Komuna e Vitisë për kultivimin e kulturave të ndryshme bujqësore, ky territor vazhdimisht po dëmtohet nga reshjet, duke u përmbytur kështu fushat më pjellore të Budrikës, Remnikut, Skifterajt, Mogillës, Pozheranit dhe Kllokotit.

Në këto fshatra zhvillohen veprimtari të shumta bujqësore, por si pasojë e të reshurave të fundit më shumë se gjysma e këtyre territoreve janë përfshirë nga një sasi e madhe e ujit që doli nga shtrati i lumit Morava. Problem kryesor për këtë është shkatërrimi i shtratit të këtij lumi, ngushtimi dhe mbyllja e tij nga mbeturinat dhe drunjtë thuhet në një njoftim të LVV dega në Viti.

Dëme më të mëdha u janë shkaktuara të mbjellave vjeshtore, konkretisht grurit, pastaj livadheve dhe kullosave si dhe kulturave pranverore, duke shkaktuar vonesa në mbjellje të misrit dhe perimeve të hershme. Në tërë Komunën e Vitisë janë përmbytur rreth 1.000 hektarë tokë pjellore, dëmet e së cilës kapin shifrën e rreth 100.000 eurove.

Përveç dëmeve në fushën e bujqësisë, të reshurat e fundit në Komunën e Vitisë kanë shkaktuar dëmtuar edhe shtëpitë nëpër fshatra, si dhe shumë rrugë sot kalohen me vështirësi, përfshirë edhe magjistralen Ferizaj-Gjilan.

Institucionet komunale thonë se kanë marrë masa shtesë vitin e kaluar për evitimin e këtyre përmbytjeve, duke u munduar ta rehabilitojnë shtratin e lumit Morava, por edhe duke kërkuar fond nga instancat më të larta qendrore për ta zgjidhur këtë problem.

Mirëpo, të gjithë po e shohim se nuk është punuar asgjë në këtë drejtim. Institucionet komunale duhet të kërkojnë nga Ministria e Mjedisit dhe Planifikimit Hapësinor që të ndajë mjete për rregullimin e shtratit të lumit Morava, mjete këto që nuk e kalojnë shumën e dëmeve që po bëhen nga vetëm një përmbytje. Nëse një gjë e tillë nuk ndodh, Komuna e Vitisë do të vazhdojë të ketë humbje të mëdha ekonomike, sidomos në sektorin e bujqësisë, që është edhe veprimtaria kryesore e qytetarëve të kësaj pjesë, dhe burim i ekzistencës për shumë familje thuhet në komunikatë./rajonipress/