Kosovës i duhen 1.5 miliardë euro për infrastrukturë

Kosova aktualisht ka projekte të gatshme për modernizimin e infrastrukturës rrugore dhe të asaj infrastrukturore që arrijnë vlerën e 1.5 miliardë eurove, shkruan sot Koha Ditore. Disa prej tyre janë në vazhdim e sipër e shumë të tjera janë në fazën fillestare. Pjesa më e madhe e tyre do të përfshihen në rrjetin bazik të infrastrukturës të gjashtë shteteve të Evropës Juglindore.

Edhe pse ende nuk është finalizuar rrjeti bazik i infrastrukturës, në samitin rajonal “Western Balkans 6” janë vendosur bazat e “rrjetit thelbësor” të infrastrukturës.

Finalizimi i rrjetit të rrugëve që do të përfshihet në kuadër të rrjetit bazik të Evropës Juglindore pritet të bëhet tek në muajin gusht, në Vjenë, kur pritet të takohen shefat e qeverive të gjashtë vendeve.

Lutfi Zharku, ministër i Infrastrukturës, ka thënë se qeveritë obligohen që të zotohen se do t’i finalizojnë këto projekte deri në vitin 2030.