Mogherini e kërkon Gjykatën Speciale

Një ditë para se Kuvendi i Kosovës të debatojë për Gjykatën Speciale, përfaqësuesja e lartë e Bashkimit Evropian, Federica Mogherini, kërkoi nga Prishtina zyrtare që ta themelojë sa më shpejt këtë institucion. Mogherini vizitoi për herë të parë Prishtinën prejse zëvendësoi në këtë post, baroneshën Catherine Ashton.

Asgjë e re nuk u tha për liberalizimin e vizave, përveç porosisë që “Kosova duhet të plotësojë kriteret për liberalizim të vizave”, duke mos përmendur data se kur mund të ndodhë një gjë e tillë.

Ndërkaq, implementimi i marrëveshjes së Brukselit, reformat ekonomike, migrimi ilegal dhe Gjykata Speciale, ishin temat që u diskutuan nga Mogherini dhe zyrtarët e lartë shtetërorë në Kosovë.

Por, sa i përket Marrëveshjes së Stabilizim-Asocimit, ndërmjet Kosovës dhe BE-së, Mogherini tha se pritet që ajo të nënshkruhet gjatë muajve të verës./zeri/