Hahn: Konferenca në Prishtinë flet shumë për potencialin bashkëpunues

Komisioneri i BE-së për Politikën e Fqinjësisë e Negociatat për Zgjerimin, Johannes Hahn është i bindur se çdo formë e bashkëpunimit rajonal ndihmon në afrimin e njerëzve dhe për bashkimin e gjërave që përshtaten mes vete.

Ai thotë se secili duhet të japë kontributin e tij për funksionimin e këtyre marrëveshjeve, sepse askush nuk mund të mbetet anash dhe të shikojë.

Në një intervistë për Deutsche Welle, komisioneri i BE-së për Politikën e Fqinjësisë e Negociatat për Zgjerimin ka thënë se fakti që kjo konferencë ka mundur të mbahet në Kosovë, dhe fakti që Serbia ka propozuar në konferencën e mbajtur herën e fundit në Beograd, që konferenca e radhës të mbahet në Kosovë, tregon se çfarë potenciali fshihet në këtë bashkëpunim multilateral.

“Besoj se çdo formë e bashkëpunimit rajonal ndihmon në afrimin e njerëzve dhe për bashkimin e gjërave që përshtaten mes vete. Në këtë kontekst, unë përshëndes rezultatet e takimit në Prishtinë, për bashkëpunimin rajonal. Në përgjithësi, ne jemi dakorduar se në ç’drejtim duhet të shkojnë rrjetet e trafikut ndërballkanik”, tha Hahn.