Haziri premton ndihma për të gjitha familjet e kthyera

Gjilan – Nga ana e tij, Lutfi Haziri theksoi faktin se Komuna e Gjilanit me të gjitha kapacitetet e saj do t’u dalë ndihmë të gjitha familjeve të kthyera.

Në mbledhjen e sotme të Bordit të Drejtorëve të Komunës së Gjilanit, nën udhëheqjen e kryetarit Lutfi Haziri, çështje kryesore ka qenë raportimi i Zyrës për Kthim dhe Komunitete për periudhën janar-mars 2015.

Gjatë kësaj periudhe, udhëheqësi i ZKK-së, Milivoje Zhivkovic, tha se sipas evidentimit të MPB dhe databazës së tyre, janë kthyer 60 familje të komuniteteve, prej të cilave 1 familje i plotëson kushtet për asistencë.

Ai tha se përmes një projekti të BE-së janë ndihmuar 3 familje, dy familje nga komuniteti rom dhe një nga komuniteti serb, duke shtuar se është punuar që personat e shpërngulur sa më parë të pajisen me dokumentacione të nevojshme në atë mënyrë që t’ju lehtësohet procesi i integrimit.

Ai tha se gjatë kësaj periudhe, ZKK ka bashkëpunuar IOM-in e UNHCR duke bërë vizita në terren lidhur me procesin e riintegrimit, sikurse edhe me USAID-in për ndërtimin e një aneks-shkolle në fshatin Ponesh, derisa ka folur edhe për projektin në fshatin Shillovë, për inicimin e biznesit ku do të përfshihen 3 familje.

Nga ana e tij, kryetari Haziri theksoi faktin se Komuna e Gjilanit me të gjitha kapacitetet e saj do t’u dalë ndihmë të gjitha familjeve të kthyera.

Kreu i Gjilanit pohoi se në bashkëfinancim me USAID-in, Komuna ka përfunduar projektin e pastrimit të lumit në fshatin Kmetoc, duke shtuar se është investuar në tërë territorin e Komunës, pa dallim, sa i përket katërshes infrastrukturore.

Kryetari Haziri ka paralajmëruar se takimi publik me qytetarët do të jetë multietnik dhe do të mbahet në muajin prill në fshatin Ponesh./rajonipress/