Petrit Selimi: Ende s’janë ndarë pozitat, nuk e di emrin e Kryeministrit

Pas Hashim Thaçit, as Petrit Selimi nuk ka treguar nëse LDK do të ketë udhëheqjen e Qeverisë. Ai ka thënë se marrëveshja e nënshkruar mes dy liderëve nuk përmenden pozitat por në lojë janë Kryeministri, Kryetari i Parlamentit dhe Presidenti.

Zëvendësministri i Punëve të Jashtme, Petrit Selimi ka thënë se me rëndësi është që bllokada politike është tejkaluar dhe tash duhet të ndërtohen institucionet e reja.

Ai ka thënë se e rëndësishme është që të arrihen të ndërtohen një program, të emërohen njerëzit e rëndësishëm dhe të realizohen premtimet elektorale.

“Presidenti, Kryeministri dhe Presidenti janë çështje e diskutimeve. Marrëveshja nuk përmend asnjë pozitë”, ka thënë Selimi.

“Nuk është optimumi as për PDK’në dhe as për LDK’në në këtë marrëveshje”, ka thënë ai.

“Mendoj se LDK vendos për pozitat e veta dhe PDK do të vendos për pozitat e veta”, ka shtuar ai.

Sipas tij, PDK nuk e ka bindur askënd për të bashkëqeverisur por ka ndodhur disa ngjarje që kanë çuar deri te marrëveshja me LDK’në.

“PDK nuk e ka bindur askënd. Mirëpo, faktet që u prezantuan – vendimet e Gjykatës Kushtetuese – ndryshuan rrethanat. E dyta, kriteret që i vuri Presidentja siç ishin dialogu, gjithëpërfshirja, integrimet europiane, mosfunksionimi i koalicionit LAN e ndërtuan rrugën e koalicionit të ri”, ka thënë Selimi, në emisionin Info Magazinë për Klan Kosovën.

Ky zyrtar i PDK’së ka deklaruar se Qeveria e re do të ndërtohet shumë shpejt, do të votohet buxheti dhe do të miratohen ligjet emergjente.

Sipas tij, Qeveria do të ketë afër 90 deputetë me shumicë shqiptarë dhe me përfshirjen e minoriteteve në Ekzekutiv.