Alban Hyseni promovon mbledhjen urgjente, por pa dhënë detaje për veprimet konkrete në terren

Gjilan – Kryetari i Gjilanit, Alban Hyseni, ka njoftuar për mbajtjen e një mbledhjeje urgjente të Këshillit Komunal për Siguri në Bashkësi, pas ngjarjeve të fundit tragjike.

Në reagimin e tij, Hyseni ka bërë të ditur se në takim mori pjesë edhe zëvendësministri i Punëve të Brendshme, Enver Dugolli, ndërsa u diskutua për situatën e sigurisë dhe u kërkua shtimi i kontrolleve policore për armëmbajtje pa leje dhe rritja e pranisë së policisë në shkolla.

Megjithatë, në njoftimin e kryetarit nuk janë dhënë detaje për veprime konkrete të ndërmarra në terren, afate të zbatimit apo masa të menjëhershme për parandalimin e rasteve të ngjashme.

Ky është reagimi i plotë i Alban Hysenit:

Sot kemi mbajtur mbledhjen urgjente të Këshillit Komunal për Siguri në Bashkësi për të adresuar situatën e sigurisë pas ngjarjeve të fundit tragjike.

Në këtë takim, ku mori pjesë edhe zëvendësministri i Punëve të Brendshme, Enver Dugolli, u njoftuam nga afër me detajet e rasteve përmes drejtorit rajonal dhe komandantit të stacionit të policisë.

Gjatë mbledhjes kërkova zyrtarisht rritjen e kontrolleve policore për armëmbajtje pa leje dhe shtimin e prezencës së policisë në shkolla për të garantuar sigurinë e fëmijëve tanë.

Si institucione komunale kemi ofruar bashkëpunim të plotë e të pakursyer me organet e rendit, ndërsa secili përfaqësues institucional mori për obligim një angazhim të shtuar për të parandaluar ngjarje të tilla në komunën tonë.

Mbrojtja e jetës së qytetarëve tanë mbetet prioriteti ynë kryesor dhe do të punojmë me vendosmëri për të garantuar qetësinë dhe rendin publik në çdo pjesë të Gjilanit./rajonipress/