Veliaj: Po të merrej prokuroria edhe me OESD-në, tash do të gjykoheshin 20 e jo 7 veta

Prishtinë – Natali Veliajt, e akuzuara kryesore në aferën e vjedhjes së 1.4 milionë eurove në tenderin e pasaportave të Ministrisë së Punëve të Brendshme, nuk i ka mjaftuar fjala përfundimtare e avokatit mbrojtës, Ali Beka, e dhënë disa ditë më parë në gjykatë.

Të hënën, pas përfundimit të fjalës përfundimtare të avokatëve të tjerë, ajo i ka thënë trupit gjykues se do të dëshironte t`i thoshte edhe disa fjalë.

Veliaj ka akuzuar prokurorin e rastit, Andrew Hughes për moskorrektësi, duke pretenduar se nuk i ka marrë parasysh të gjitha rrethanat.

“Edhe sot e ndiej veten të trajtuar padrejtësisht nga prokurori se unë veç dy deklarata i kam dhënë në prokurori dhe jo pesë siç po thotë ai. Për ato 1.4 milionë euro unë asnjë përfitim nuk e kam pasur për shkak të besimit që e kam pasur me kompaninë austriake. Vetëm i kam zbatuar urdhrat e tyre. Prokuroria nuk ka tentuar asnjëherë t`i kontaktojë se tash nuk do të ishin këtu 7-8 veta duke u gjykuar, por 20 veta”, ka thënë ajo.

Grupi i udhëhequr nga Natali Velijaj dhe Fisnik Blakaj akuzohet për përfshirje në krim të organizuar në rastin e skandalit të kontratës së furnizimit me pasaporta të Ministrisë së Punëve të Brendshme nga Kompania austriake OESD (se çfarë thanë të akuzuarit e tjerë, Fisnik Balaj, Nazmi Thaçi, Sefedin Shala.(“Koha Ditore”).
© KOHA.net