Në Muqiverc dyshohen shtatë krerë gjedhe pa dokumente, rasti po hetohet për kontrabandë

Kamenicë – Policia zbulon shtatë krerë gjedhe pa dokumentacion në një stallë në Muqivërc, përmes incizimeve me dron

Shtatë krerë gjedhe, për të cilët mungonin dokumentet përkatëse, janë gjetur gjatë një kontrolli në një stallë në fshatin Muqivërc.

Sipas raportit policor, njësia e TASK-Forcës, në bashkëpunim me Stacionin Policor për Mbikëqyrjen e Kufirit (SPMK), kishte vërejtur përmes incizimeve me dron se në shtëpinë e një të dyshuari, mashkull kosovar, ishin futur disa kafshë të dyshuara si të kontrabanduara.

Gjatë kontrollit në stallë, zyrtarët kanë gjetur shtatë krerë gjedhe pa dokumentacionin e nevojshëm.

Lidhur me rastin janë njoftuar prokurori dhe inspektori i Agjencisë së Ushqimit dhe Veterinarisë (AUV). Sipas policisë, mbetet të verifikohet mosha e kafshëve, të cilat do të qëndrojnë në karantinë.

Rasti është duke u trajtuar në procedurë hetimore, ndërsa autoritetet do të vazhdojnë verifikimet përkatëse./rajonipress/