Lirohen tre serbë të Novobërdës të akuzuar për krime lufte

Kolegji gjyqësor i Gjykatës Themelore të Prishtinës ka liruar sot tre serbë nga komuna e Novobërdës, të akuzuar për krime lufte të kryera në Kosovë në vitin 1999. Vëllezërit Sllobodan e Sreqko Martinoviq dhe Svetllana Stojanoviq, u liruan nga akuzat për veprat që u ngarkoheshin për mungesë faktesh, u deklaroi mediave serbe avokati Dejan A. Vasiq, i cili mbronte të akuzuarin Sreqko Martinoviq, përcjell koha.net.

“Gjykata Themelore e Prishtinës, një kolegj i përzier që kryesohej nga gjyqtari Vlladimir Mikulla, sot mori vendim lirues kundër dy vëllezërve Sllobodan e Sreqko Martinoviq dhe Svetllana Stojanoviq”, citojnë mediat deklaratën e avokatit Vasiqit.

Sipas tij, Gjykata nuk gjeti fakte të mjaftueshme në procedurën e përsëritur, ndërsa dëshmia e të vetmit shqiptar të dëmtuar, Selatin Beqirit, u vlerësua jobindëse.

Këta tre serbë i kishte arrestuar policia e EULEX-it më 24 shtator të vitit 2009 me dyshimin se gjatë luftës në Kosovë kishin kryer krime lufte ndaj popullsisë civile, përcjell koha.net.

Se nuk ishin fajtor, Gjykata Themelore e vërtetoi gjatë procedurës së parë, por pas ankesës së Prokurorisë, Gjykata e Apelit urdhëroi përsëritjen e procesit që u mbyll sot me vendim lirues.