Haradinaj: PDK të lëshojë rrugë, s’ka nevojë për zgjedhje

Pas një takimi maratonik, që ka zgjatur dy orë e gjysmë në selinë e AAK-së, Ramush Haradinaj tha se ky ka qenë takim i rregullt i Bllokut LVAN, derisa ka kërkuar edhe një herë nga kryesuesja Flora Brovina që ta thërret seancën e Kuvendit.

Haradinaj ka mohuar që në këtë takim të jetë biseduar për ridizajnim të marrëveshjes së Bllokut, kurse ka hedhur poshtë opsionin e mbajtjes së zgjedhjeve të jashtëzakonshme.

“Është e pamundur të shkohet në zgjedhje kur e kemi shumicën parlamentare”, ka thënë Haradinaj.

“PDK-ja duhet të heqë dorë nga pozita e kryeparlamentarit, sepse asnjë variant nga Blloku nuk do të shkojë në favor të PDK-së”, ka thënë kreu i AAK-së.

Sipas tij, edhe Presidentja duhet të ndikojë te Flora Brovina për të thirrur seancën e Kuvendit, për të vazhduar pastaj me ndërtimin e Qeverisë.

Ai ka thënë se nuk ka dëgjuar ndonjë afat nga Presidentja për mundësinë e shpalljes së zgjedhjeve të jashtëzakonshme.

“Nuk kam dëgjuar për ndonjë afat të Presidentes”, ka thënë Haradinaj.