Lutfi Haziri, takime të rëndësishme në Kanada për zhvillimin ekonomik të Gjilanit

Gjilan – Në ditën e tretë të vizitës zyrtare në Alberta të Kanadasë, kryetari I Komunës së Gjilanit, Lutfi Haziri, ka takuar kryetarin e Calgary, Naheed Nenshi, si dhe është pritur në një takim pune nga zëvendës presidentja e Agjencisë për Zhvillim Ekonomik të Calgary-it, Gillian McCormack dhe drejtoresha ekzekutive e Qendrës Globale të Biznesit, Bonnie Nunnari.

Me kryetarin Nenshi u diskutuan mundësitë e bashkëpunimit në mes dy qyteteve dhe qeverive lokale përkatëse.

Kryetari Haziri u sigurua nga kryetari Nenshi se ai dhe qeveria e tij janë të gatshme për të përkrahur ngritjen e kapaciteteve zhvillimore ne Gjilan.

Ndërsa, në takimin me znj. McCormack dhe znj. Nunnari u diskutuan përvojat e tyre ne atraktimin e investimeve të huaja si dhe mënyrat e bashkëpunimit.
“Ne jemi të gatshëm që të mësojmë nga praktikat më të mira e më të suksesshme ndërkombëtare të çasjes në zhvillim ekonomik lokal e rajonal dhe përvojat e marra nga autoritetet përkatëse në Calgary, janë të shkëlqyeshme”, ka thënë Haziri.

Kreu i Gjilanit dhe përfaqësueset e sektorit të zhvillimit ekonomik në Calgary, u pajtuan që Gjilani mund të kthehet në një qendër rajonale të zhvillimit ekonomik dhe për këtë do të përdoren edhe strategjitë e suksesshme të implementuara në Calgary deri më tani./rajonipress/