Matoshi: Policia së shpejti me prezencë të përhershme në Karaqevë

Kamenicë – Nënkryetari i Komunës së Kamenicës Fatmir Matoshi, së bashku me zëvendëskomandantin e Stacionit Policor Gani Huruglica, përgjegjësin e stacionit të policisë në Muqiverc Toger Milaim Demolli, drejtorin e Shëndetësisë Agim Bucolli, Drejtorin e QKMF-së, Rabit Dërmaku, komandantin e KFOR- it, njësia LMT Kapitenin Gorforth dhe përfaqësuesin e Departamentit për Mirëmbajtjen e Objekteve të Policisë sot vizituan fshatin Karaqevë.

Qëllimi i kësaj vizite ishte hapja e një pike të përhershme të stacionit policor në fshatin Karaqevë, pikërisht në gjysmën e objektit të ambulancës së fshatit. Nënkryetari i Kamenicës Fatmir Matoshi ka thënë se sot po fillon të implementohet një punë për të cilën kemi pasur takime e biseda me shumë faktorë relevantë në muajt e kaluar. ”Duke u përgjigjur në kërkesën e stacionit policor, ne kemi vendosur që një pjesë të këtij objekti t`ia japim në shfrytëzim pa kompensim policisë e cila është e përkushtuar që këtu të vendos një pikë të përhershme të sajën deri në zgjidhjen e problemit të vijës kufitare. Ky është një përkushtim i yni që banorët e fshatrave Karaqevë e epërme dhe e Poshtme të ndihen më të sigurt dhe njëkohësisht policia të jetë sa më pranë qytetarëve të kësaj ane” ka thënë Matoshi.

Falënderime ndaj Komunës së Kamenicës patën udhëheqësit e policisë Zëvendëskomandanti Gani Huruglica dhe Togeri Milaim Demolli.

Ndërsa këtë projekt e ka vlerësuar lartë edhe Kapiteni Gorforth, i cili në emër të KFOR-it u shpreh i gatshëm që të përfshihen në realizimin e këtij projekti.

Në ditët zyrtarë të Policisë së Kosovës do të jenë në këtë objekt për të hartuar projektin e renovimit të tij dhe shumë shpejt, patrullat e policisë së Kosovës do të kenë prezencë të përhershme në këtë pjesë dhe qytetarët mund t`i paraqesin problemet e tyre në këtë zyre raportuese./rajonipress/