S’i binden Metës

Kryeparlamentari i Shqipërisë, Ilir Meta, gjatë vizitës në Kosovë nuk ka arritur t’i bindë përfaqësuesit e opozitës për zhbllokimin e krizës politike në vend.

Meta gjatë kësaj vizite ka takuar krerët e shtetit dhe drejtuesit e partive politike opozitare, dhe u kërkuar partive parlamentare që t’i afrojnë qëndrimet për të zhbllokuar situatën në Kuvendin e Kosovës.

Të dielën Meta është pritur në takim nga presidentja e Kosovës, Atifete Jahjaga, e cila e ka njoftuar kryeparlamentarin e Shqipërisë për angazhimin e saj për të krijuar kushte për dialog politik mes koalicionit qeverisës dhe subjekteve politike opozitare.

Në anën tjetër, përfaqësuesit e partive opozitare takimin me Metën e kanë vlerësuan lart, të cilit, siç kanë thënë ata, ia kanë bërë të qartë se nuk mund të ketë zgjidhje të krizës politike në vend, pa tërheqjen e nënshkrimeve nga marrëveshjet për Asociacionin dhe Demarkacionin.

Frashër Krasniqi nga Lëvizja “Vetëvendosje” i ka thënë gazetën “Zëri” se përpos tërheqjes së nënshkrimeve, duhet të lirohen, siç ka thënë ai, edhe të burgosurit politikë.

“Kryetari i Vetëvendosjes është takuar me kryetarin e Kuvendit të Shqipërisë, të cilit i është sqaruar se nuk mund të ketë zgjidhje të krizës në vend pa tërheqjen e marrëveshjeve nga Qeveria dhe pa lirimin e të burgosurve politikë”, ka thënë Krasniqi.

Edhe kreu i AAK-së, Ramush Haradinaj, ka thënë për media se takimi me kryetarin e Kuvendit të Shqipërisë, Ilir Meta, ishte një përpjekje për ta gjetur një zgjidhje për tejkalimin e krizës politike në vend.

Ndërkaq, sekretari i përgjithshëm i “Nismës për Kosovën”, Bilall Sherifi, ka thënë për “Zërin” se ia kanë bërë me dije Metës që pa anulim të marrëveshjeve nuk do të mundë të ketë normalizim të situatës./zeri/