Miliardat në ‘lloçin’ politik të Kosovës

SHBA-ja e zhgënjyer me paaftësinë e treguar nga qeveritë kosovare.Punësimi i njerëzve dështoi, donacionet pasuruan zyrtarët.

Sipas analistëve, një pjesë e madhe e miliardave të dhëna për ndërtimin e shtetit në Kosovë nga BEja dhe SHBA-ja shkuan për ndërtimin e shtëpive të shtrenjta, veturave luksoze të lidershipit kosovar të pasluftës

Analistët e ekonomisë dhe deputetët e Kuvendit të Kosovës janë të një mendimi se fjalimi i sekretarit amerikan, John Kerry, me rastin e vizitës së tij të shkurtër në vendin tonë ishte një shuplakë e fortë për lidershipin aktual, të cilit i ka kërkuar të tregojë rezultatet në punësimin e qytetarëve. Analistët thonë se deklarata e shefit të diplomacisë amerikane ishte një sinjal i qartë për ekonominë e brishtë.

Ndërsa, opozita akuzon se Qeveria e tashme ka premtuar mijëra vende pune, por nuk ka pasur asnjë rezultat. Zëdhënësi i lëvizjes “Vetëvendosje”, Frashër Krasniqi, thotë për “Kosova Sot” se është e qartë që Qeveria e Kosovës, prejse është formuar ky koalicion, është marrë vetëm me kërkesat e Serbisë dhe aspak me kërkesat e qytetarëve për përmirësimin e jetës së tyre./kosova sot/