Zot, mos më quaj mëkatar

Zot, mos më quaj mëkatar pse kërkoj të jem me Ty, kur e kam më së ngushti.

Beso, nuk të harroj as kur jam plotësisht i lirë.
Por, ëndrrat na kanë zhgënjyer e lisin e paprerë
të Arës së Gatë nuk po e gjejmë dot nga frika e
djajve të natës.

Ata duan ta hanë mishin tonë e të
mos na i lënë as eshtrat në tavernë. Po na i lëpijnë
edhe pjatat e zbrazura, për të mos lënë gjurmët në
kohën e ardhme, se duan që edhe ajo të jetë e tyre.

Medet për këtë shekull të ri e të vjetër për ne,
kur si atëherë e si sot, nuk e dimë dot se çka na
pret.

E Ti na largo nga theqafja e pakthim. Mos
lejo që emrat tanë të mbeten të harruar.

Ramadan Mehmeti