Riza Shala: Ndaj pensionistëve është shkaktuar gjenocid institucional

Gjilan – Riza Shala kryetar i Federatës së Sindikatave të Pensionistëve dhe Invalidëve të Punës tha të hënën në Gjilan se gjendja e pensionistëve është e rëndë dhe e mjerë. Të gjitha partitë politike gjatë fushatave zgjedhore po i shfrytëzojnë pensionistët kurse problemi i tyre edhe pas 15 vitesh mbetet në pikën zero. Thjeshtë ndaj pensionistëve është shkaktuar gjenocid institucional tha Shala.

Në një debat që ka organizuar Sindikata e Pensionistëve dhe Invalidëve të Punës në Gjilan është kritikuar Qeveria dhe institucionet tjera përgjegjëse të cilat sipas kësaj sindikate nuk i kanë trajtuar asnjëherë si duhet problemet e pensionistëve, raporton rajonipress.

Muharrem Bajrami kryetar i SPIP dega në Gjilan tha se është turp që institucionet edhe pas kaq vitesh nuk e zgjidhin problemin e pensionistëve. “Edhe ne kemi dhënë për këtë Kosovë e për këto institucione. Djersa dhe mundi jonë nuk janë shpaguar asnjëherë, përkundrazi jemi injoruar e përbuzur” tha Bajrami.

Kurse Riza Shala kryetar i Federatës Sindikale të Pensionistëve dhe Invalidëve të Punës në Kosovë ka akuzuar Qeverinë se nuk po merret seriozisht me problemin e kësaj kategorie. “Ndaj nesh thjeshtë është shkaktuar gjenocid institucional sepse të gjitha partitë politike gjatë fushatave të tyre zgjedhore po i shfrytëzojnë pensionistët për nevojat e tyre, por më vonë po i harrojnë hallet e tyre”.

Shala tha se ministri Abrashi po përpiqet të bëjë diçka më tepër, por e keqja është se Qeveria po e ndihmon vetëm Lidhjen e Pensionistëve e cila që nga fillimi ishte servile ndaj PDK-së.

Shala e ka kujtuar një zotim të Hashim Thaçit i cili kishte premtuar zgjidhje të problemit brenda disa muajve, por kjo nuk ndodhi as pas kaq vitesh. “Ne si sindikatë jemi apolitikë, por të gjitha qeveritë i kanë tradhtuar interesat e pensionistëve. Ne i kemi shterur të gjitha rrugët dhe mundësit institucionale. Tani ne nuk mund të dalim në rrugë e të protestojmë, ose të bllokojmë institucionet. Neve na ka mbetur vetëm rruga paqësore për t`i zgjidhur problemet”.

Shala tha se Shaban Kajtazi nuk mund t`i përfaqësojë interesat e Pensionistëve të Kosovës sepse gjithmonë ishte afër njerëzve të PDK-së./rajonipress/