Tragjedia në Demiraj të Gjilanit merr epilog të ri: Arrestohet 65-vjeçari i dyshuar për vrasje të rëndë të djalit dhe foshnjës

Gjilan – Policia e Kosovës ka arrestuar një 65-vjeçar, i cili dyshohet se është i përfshirë në rastin tragjik të ndodhur në fshatin Demiraj të Gjilanit, ku më 1 nëntor u gjetën pa shenja jete një person i lindur në vitin 1999 dhe një foshnjë. Sipas hetimeve fillestare, dyshohet se ngjarja ka ndodhur brenda familjes, ndërsa i dyshuari, babai i viktimës mashkull, është ndaluar për 48 orë me vendim të prokurorit.

Rasti i rëndë që tronditi fshatin Demiraj dhe rajonin e Gjilanit ka marrë një zhvillim të ri, pasi Policia e Kosovës ka arrestuar personin e dyshuar në lidhje me vdekjen e dy personave, një burri të ri dhe një foshnjeje.

Sipas Ismet Hasahnit, informacioni për rastin ishte pranuar më 1 nëntor 2026, rreth orës 08:47, kur autoritetet ishin njoftuar për praninë e dy trupave të pajetë në një shtëpi në fshatin Demiraj të Komunës së Gjilanit.

Menjëherë pas marrjes së informacionit, në vendin e ngjarjes kishin dalë njësitet përkatëse policore, Prokurori i Shtetit dhe ekipi emergjent mjekësor. Pas ekzaminimit nga mjeku kujdestar, ishte konstatuar se të dy personat nuk kishin shenja jete.

Zhvillimi i hetimeve fillestare në vendin e ngjarjes ka ngritur dyshimet se incidenti ka ndodhur brenda familjes. Në cilësinë e personit të dyshuar është arrestuar një 65-vjeçar, babai i viktimës mashkull, i cili, me vendim të Prokurorit të Shtetit, është ndaluar për 48 orë.

Ndërkohë, trupat e pajetë janë dërguar në Institutin e Mjekësisë Ligjore në Prishtinë, ku do t’i nënshtrohen obduksionit për përcaktimin e shkakut të vdekjes.

Policia e Kosovës, në bashkëpunim dhe koordinim me Prokurorinë e Shtetit, është duke vazhduar veprimet operative dhe hetimore me qëllim të ndriçimit të plotë të rrethanave dhe dokumentimit të rastit, i cili tashmë është cilësuar si “Vrasje e Rëndë”.

Hetimet pritet të sqarojnë rrethanat në të cilat ndodhi kjo tragjedi familjare, ndërsa autoritetet nuk kanë bërë ende publike detaje të tjera lidhur me dinamikën e ngjarjes.

Personi i arrestuar është i dyshuar dhe prezumohet i pafajshëm deri në një vendim përfundimtar të gjykatës./rajonipress/