Tri raste në Gjilan, Viti dhe Ranillug: Arrestohen pesë persona për dhunë në familje dhe narkotikë

Gjilan – Pesë persona janë arrestuar në tri raste të ndara në Ranillug, Viti dhe Gjilan, nën dyshimin për dhunë në familje, lëndim të lehtë trupor dhe posedim të paautorizuar të substancave narkotike.

Sipas raportit të Policisë së Kosovës, në Ranillug, më 26 tetor, rreth orës 19:40, është arrestuar një person i dyshuar, pasi dyshohet se pas një fjalosjeje ka sulmuar fizikisht motrën e tij. Të dy kanë marrë tretman mjekësor, ndërsa i dyshuari është dërguar në mbajtje me vendim të prokurorit.

Një rast tjetër i dhunës në familje është raportuar në Viti, po më 26 tetor, rreth orës 19:00. Sipas policisë, bashkëshorti dhe vëllai i viktimës dyshohet se kanë ushtruar dhunë fizike ndaj saj. Viktima ka marrë tretman mjekësor, ndërsa dy të dyshuarit janë arrestuar dhe dërguar në mbajtje me vendim të prokurorit.

Ndërkaq, në rrugën “Hamdi Kurteshi” në Gjilan, rreth orës 23:00, janë arrestuar dy persona të dyshuar, pasi gjatë kontrollit policor u është gjetur dhe konfiskuar një sasi e substancës së dyshuar narkotike të llojit marihuanë.

Edhe në këtë rast, me vendim të prokurorit, të dyshuarit janë dërguar në mbajtje.

Policia nuk ka dhënë detaje të tjera lidhur me rastet./rajonipress/