Gjashtë persona ndalohen, përfshirë një të mitur – Prokuroria paraqet edhe gjashtë kërkesa për paraburgim

Gjilan – Prokuroria Themelore në Gjilan ka ndaluar gjashtë persona të dyshuar për vepra të ndryshme penale, përfshirë sulm seksual, dhunë në familje, sulm dhe lëndim të lehtë trupor. Brenda së njëjtës ditë, prokuroria ka paraqitur edhe gjashtë kërkesa për caktimin e masave të paraburgimit ndaj tetë personave, si dhe ka ngritur katër aktakuza.

Sipas njoftimit të Prokurorisë Themelore në Gjilan, më 27 tetor 2026, ndalimet janë realizuar në tri raste të ndara, me urdhër të prokurorit kujdestar.

Një i mitur është ndaluar nën dyshimin për veprën penale të sulmit seksual, një person për dhunë në familje, ndërsa katër persona të tjerë për veprat penale të sulmit dhe lëndimit të lehtë trupor.

Po ashtu, prokuroria ka paraqitur gjashtë kërkesa për caktimin e masave të paraburgimit ndaj gjithsej tetë personave. Kërkesat përfshijnë dy persona të dyshuar për posedim të paautorizuar të narkotikëve, katër për dhunë në familje, një për lëndim të lehtë trupor dhe një të mitur për sulm seksual.

Ndërkohë, më 27 tetor 2026, Prokuroria Themelore në Gjilan ka ngritur edhe katër aktakuza ndaj katër personave për vepra të ndryshme penale: posedim të paautorizuar të narkotikëve, dhunë në familje, keqpërdorim të besimit dhe vjedhje.

Prokuroria nuk ka bërë të ditura detaje shtesë lidhur me rrethanat e rasteve apo identitetin e personave të përfshirë.

Të gjithë të dyshuarit konsiderohen të pafajshëm derisa fajësia e tyre të vërtetohet me vendim përfundimtar të gjykatës./rajonipress/