Vergori: Optimizimi i KFOR-it nuk nënkupton tërheqje nga Kosova

Komandanti i ri i misionit të KFOR-it në Kosovë, gjeneralmajor Roberto Vergori, ka thënë se procesi i optimizimit të misionit nuk nënkupton tërheqje nga Kosova dhe as zvogëlim të përkushtimit për mbrojtjen e të gjitha komuniteteve, duke theksuar se KFOR-i do të vazhdojë të ruajë një mjedis të sigurt dhe lirinë e lëvizjes për të gjithë qytetarët.

Në një konferencë për media pas marrjes së detyrës, Vergori ka thënë se misioni do të vazhdojë të zbatojë mandatin e bazuar në Rezolutën 1244 të Këshillit të Sigurimit të Kombeve të Bashkuara, ndërsa do të përshtatë praninë dhe veprimtarinë e tij sipas vlerësimit të situatës së sigurisë në terren.

“Ky proces nuk nënkupton tërheqje nga misioni dhe në asnjë mënyrë nuk e zvogëlon përkushtimin e KFOR-it për mbrojtjen e të gjitha komuniteteve dhe për të punuar në të mirë të tyre, gjithmonë dhe pa dallim, çdo ditë. Këtë do ta bëjmë në koordinim të ngushtë me Policinë e Kosovës dhe njësitë e Misionit të Bashkimit Evropian për Sundimin e Ligjit në Kosovë (EULEX), duke respektuar rolin përkatës të secilit në reagimin ndaj çështjeve të sigurisë”, tha ai.

Vergori ka theksuar se gjatë mandatit të tij KFOR-i do të veprojë me vendosmëri, disiplinë dhe paanshmëri, duke synuar ruajtjen e stabilitetit dhe krijimin e kushteve të sigurisë që mbështesin edhe përpjekjet diplomatike për normalizimin e marrëdhënieve ndërmjet Kosovës dhe Serbisë.

“Misioni ynë nuk ka ndryshuar, ashtu siç nuk ka ndryshuar as përkushtimi ynë ndaj komuniteteve në Kosovë. Ne mbetemi thellësisht të përkushtuar për përmbushjen e mandatit të KFOR-it, të bazuar në Rezolutën 1244 të Këshillit të Sigurimit të Kombeve të Bashkuara të vitit 1999, duke kontribuar në ruajtjen e një mjedisi të sigurt dhe të qetë, si dhe të lirisë së lëvizjes për të gjithë njerëzit që jetojnë në Kosovë”.

“Gjatë mandatit tim, do të qëndrojmë të palëkundur në ruajtjen e stabilitetit dhe sigurisë. Do të veprojmë me vendosmëri dhe disiplinë, si dhe me paanshmëri të palëkundur, në të mirë të të gjitha komuniteteve. Gjithashtu, do të vazhdojmë të krijojmë kushtet e sigurisë që mbështesin përpjekjet diplomatike, përfshirë dialogun për normalizimin e marrëdhënieve ndërmjet Beogradit dhe Prishtinës, të lehtësuar nga Bashkimi Evropian”, tha ai.

Komandanti i ri i KFOR-it ka thënë se vlerësimi i vazhdueshëm i situatës në terren është thelbësor për përshtatjen e pranisë së misionit dhe rritjen e efektivitetit të tij.

“Në fakt, është thelbësore që të vazhdojmë ta vlerësojmë situatën në terren dhe ta përshtatim praninë tonë në përputhje me të, në mënyrë që të maksimizojmë ndikimin e misionit, duke e përqendruar më mirë veprimtarinë dhe duke forcuar angazhimin tonë për sigurinë dhe mbrojtjen”, tha ai.

Vergori ka theksuar se synimi kryesor i KFOR-it mbetet krijimi i kushteve për një të ardhme me paqe të qëndrueshme, demokraci dhe prosperitet për gjeneratat e reja.

“Synim yni kryesor është të sigurojmë që KFOR-i të vazhdojë të luajë rolin e tij, në mënyrë që, së bashku dhe në mënyrë të bashkërenduar, të krijojmë kushtet e duhura për një të ardhme në të cilën gjeneratat e reja mund të përfitojnë plotësisht nga paqja e qëndrueshme, demokracia dhe prosperiteti”, tha ai.

Në të njëjtën konferencë, admirali George M. Wikoff, komandant i Komandës së Forcave të Përbashkëta Aleate të NATO-s në Napoli (JFC Naples), ka thënë se fokusi i KFOR-it mbetet siguria dhe mbrojtja e të gjithë njerëzve që jetojnë në Kosovë.

Ai ka shpjeguar se siguria në jetën e përditshme nënkupton mundësinë që qytetarët të lëvizin lirshëm, të shkojnë në punë e në shkollë, të vizitojnë familjet dhe të kenë qasje në objektet e kultit.

“Fokusi ynë mbetet i qartë: siguria dhe mbrojtja për të gjithë njerëzit që jetojnë në Kosovë.Për njerëzit që jetojnë këtu, siguria ka një kuptim praktik. Ajo nënkupton mundësinë për të udhëtuar lirshëm drejt punës, për t’i dërguar fëmijët në shkollë, për të vizituar familjen dhe për të pasur qasje në objektet e kultit. KFOR-i ndihmon në krijimin e kushteve që mundësojnë këtë qasje të lirë. Përmirësimi i situatës së sigurisë ka krijuar mundësi për të optimizuar dislokimin e KFOR-it, në mënyrë që ai t’u përgjigjet kërkesave të mandatit tonë”, tha Wikoff.

Wikoff ka theksuar se patrullimet dhe komunikimi i rregullt me përfaqësuesit e komuniteteve lokale ndihmojnë KFOR-in të kuptojë shqetësimet e tyre për sigurinë.

Ai ka nënvizuar gjithashtu mbështetjen e NATO-s për dialogun e lehtësuar nga Bashkimi Evropian dhe nevojën që palët të angazhohen në mënyrë konstruktive.

“Patrullimet dhe angazhimi i rregullt me përfaqësuesit e të gjitha komuniteteve lokale na ndihmojnë t’i kuptojmë shqetësimet e tyre për sigurinë dhe të shpjegojmë mënyrën se si po i përmbushim përgjegjësitë tona. Siguria afatgjatë kërkon gjithashtu një proces politik. NATO-ja vazhdon ta mbështesë plotësisht dialogun ndërmjet Beogradit dhe Prishtinës, të lehtësuar nga Bashkimi Evropian, si kornizë për trajtimin e çështjeve të pazgjidhura dhe për arritjen e zgjidhjeve që respektojnë plotësisht të drejtat e të gjitha komuniteteve”.

“Presim që të dyja palët të angazhohen plotësisht, në mënyrë konstruktive dhe me vullnet të mirë. KFOR-i ndihmon në forcimin e kushteve të sigurisë që mundësojnë përparimin e dialogut. Pritshmëritë e mia nga gjeneralmajor Vergori dhe ekipi i tij janë të qarta: të ruajnë gatishmërinë, të mbeten të angazhuar me të gjitha komunitetet dhe të vazhdojnë ta kryejnë misionin me profesionalizmin dhe paanshmërinë e paraardhësve të tyre”, tha Wikoff.