Mbi 1,600 gjoba në një javë në rajonin e Gjilanit, Policia shton kontrollet për sigurinë në trafik

Gjilan – Policia e Kosovës ka intensifikuar aktivitetet në trafikun rrugor në rajonin e Gjilanit, me qëllim rritjen e sigurisë dhe parandalimin e aksidenteve. Gjatë periudhës 21–27 gusht 2026, Drejtoria Rajonale e Policisë në Gjilan, Njësia Rajonale e Trafikut Rrugor dhe stacionet policore kanë shqiptuar gjithsej 1,635 gjoba ndaj kundërvajtësve në trafik.

Në kuadër të planeve operative për siguri në komunikacion, gjatë kësaj periudhe janë hetuar edhe 27 aksidente trafiku me dëme materiale dhe 21 aksidente me persona të lënduar, duke pasqyruar nevojën për kujdes dhe respektim më të madh të rregullave gjatë qarkullimit.

Kontrollet policore kanë evidentuar edhe shkelje konkrete të rregullave të trafikut. Për mosvendosje të rripit të sigurisë janë shqiptuar 15 gjoba, ndërsa për përdorim të telefonit gjatë drejtimit të automjetit janë shqiptuar 27 gjoba. Po ashtu, ndaj 37 ngasësve është shqiptuar masa e ndalimit të drejtimit të mjeteve motorike.

Policia Rajonale në Gjilan u ka bërë apel të gjithë pjesëmarrësve në trafik që të tregojnë kujdes të shtuar dhe të respektojnë rregullat e komunikacionit, veçanërisht kufizimet e shpejtësisë, përdorimin e rripit të sigurimit dhe ndalimin e përdorimit të telefonit gjatë vozitjes.

“Shpejtësia nuk është krenari, por shkak i tragjedisë”, është mesazhi i Policisë, e cila ka kërkuar gjithashtu respektim të sinjalistikës dhe semaforëve, si dhe kujdes të veçantë ndaj këmbësorëve.

Autoritetet rikujtojnë se siguria në rrugë nuk varet vetëm nga kontrollet policore, por nga përgjegjësia e secilit pjesëmarrës në trafik./rajonipress/