“Dëshmorët kanë vetëm ditëlindje”, Bresalci dhe Anamorava nderojnë heroin Ibrahim Uruqi

Gjilan – Me një manifestim përkujtimor të mbushur me respekt, kujtesë dhe krenari kombëtare, Bresalci dhe Anamorava kanë nderuar figurën e Ibrahim Uruqit, kryengritësit politik e ushtarak dhe luftëtarit të lirisë, duke e rikthyer në vëmendje veprën dhe amanetin e tij për lirinë dhe bashkimin e shqiptarëve.

Përmes një postimi, Lutfi Haziri ka përcjellë mesazhin se dëshmorët nuk largohen nga kujtesa e kombit, pasi, siç shprehet ai, “dëshmorët kanë vetëm ditëlindje”. Në këtë frymë, manifestimi në Bresalc u shndërrua në një homazh për jetën, veprën dhe trashëgiminë e Ibrahim Uruqit, emri i të cilit tashmë është pjesë e shkollës, librave dhe këngëve, ndërsa nga ky vit edhe i një turneu të madh të futsallit.

Haziri e përshkruan Uruqin si një figurë që la gjurmë në historinë e Anamoravës dhe të lëvizjes për liri, duke theksuar se vepra e tij vazhdon të jetë pjesë e kujtesës kolektive dhe se amaneti i tij për bashkimin e shqiptarëve mbetet i gjallë edhe te brezat e rinj.

Në këtë rrëfim për kujtesën dhe trashëgiminë familjare, Haziri ka veçuar edhe pasardhësit e heroit. Sipas tij, Imrani ka rritur dhe edukuar Albulenën dhe Endritin, të cilët sot i kontribuojnë Republikës përmes dijes dhe mbrojtjes. Ndërsa Albulena e Zeka po rrisin Marën dhe Anën, Endriti ka Kianin, duke krijuar kështu një brez të ri që po rritet me tregimet dhe kujtimet për gjyshin Hero.

Kjo trashëgimi familjare, sipas Hazirit, dëshmon se kujtimi për të rënët nuk mbetet vetëm në ceremonitë përkujtimore, por përcillet nga një brez te tjetri, përmes historive familjare, edukimit dhe vlerave të trashëguara.

Manifestimi në Bresalc u zhvillua si një moment i veçantë përkujtimi për një figurë që ka lënë gjurmë në historinë e kësaj treve, ndërsa Këshilli organizativ i Bresal­cit është vlerësuar për organizimin e manifestimit dhe për ruajtjen e kujtesës ndaj atyre që dhanë kontribut për lirinë.

“Dëshmorët kanë vetëm ditëlindje” mbetet kështu edhe një mesazh simbolik se vdekja fizike nuk e shuan kujtimin e atyre që jetën e tyre ia kushtuan një ideali – sepse emri i tyre vazhdon të jetojë në familje, në histori dhe në kujtesën e brezave./rajonipress/