Gjenden mjete të pashpërthyera gjatë punimeve në rrugë në Gjilan, intervenojnë njësitë e deminimit

Gjilan – Disa mjete të dyshimta, që dyshohet se kanë mbetur nga periudha e luftës, janë gjetur gjatë punimeve në një rrugë në Gjilan.

Sipas raportimit, gjatë punimeve janë hasur fishekë, karikatorë, armë të gjata, granata dore dhe një uniformë ushtarake. Pas evidentimit të mjeteve, njësia policore ka siguruar menjëherë vendin e ngjarjes, duke ndërmarrë masat e nevojshme për garantimin e sigurisë.

Në vendin e ngjarjes kanë dalë njësitë për deminim të KFOR-it dhe FSK-së, të cilat kanë bërë tërheqjen e mjeteve të dyshimta pa ndonjë incident.

Rasti rikujton rrezikun që ende mund të paraqesin mjetet e mbetura nga periudha e luftës, veçanërisht gjatë punimeve në terrene ku mund të ekzistojnë mjete të pashpërthyera. Autoritetet vazhdojnë të apelojnë që qytetarët të mos i prekin apo lëvizin mjetet e dyshimta, por të njoftojnë menjëherë Policinë e Kosovës./rajonipress/