Gjilani mes zhgënjimit dhe shpresës: Qytetarët kërkojnë më shumë punë, më pak zhurmë politike

Gjilan – Dikur përmendej si një prej qyteteve më të gjalla dhe më urbane të Kosovës, me një identitet të veçantë qytetar, hapësira të gjelbra, investime dhe një jetë të zhvilluar publike e politike. Sot, një pjesë e qytetarëve të Gjilanit thonë se qyteti po përballet me një realitet tjetër: më shumë debate e deklarata, më pak projekte të përfunduara dhe një ritëm zhvillimi që, sipas tyre, nuk përputhet me nevojat dhe potencialin e qytetit.

Në rrugët e Gjilanit, pakënaqësia ndaj qeverisjes komunale dëgjohet gjithnjë e më shpesh. Kritikat nuk lidhen vetëm me një projekt apo një problem të veçantë, por me atë që qytetarët e perceptojnë si mungesë të një vizioni të qartë zhvillimor dhe pamjaftueshmëri të investimeve publike.

Për disa prej tyre, vitet e fundit janë karakterizuar nga një paradoks: shumë paralajmërime, shumë komunikim politik dhe shumë premtime, por një bilanc që, sipas tyre, nuk është në proporcion me pritjet e krijuara.

“Shumë zhurmë, pak realizim” është përshtypja që përsëritet në mesin e qytetarëve kritikë të kësaj qeverisjeje.

Gjilani, thonë ata, nuk mund të kënaqet vetëm me projekte që nisin, por ka nevojë për projekte që përfundojnë, funksionojnë dhe ndryshojnë realisht jetën e qytetarëve.

“E kam votuar LVV-në, por jam i zhgënjyer”

Në mesin e qytetarëve që shprehin pakënaqësi është edhe Mersadi, banor i lagjes Arbëria, i cili thotë se zhgënjimi i tij është edhe më i madh për faktin se në zgjedhjet e kaluara kishte votuar Lëvizjen Vetëvendosje.

“Unë jetoj në lagjen Arbëria. Kjo qeverisje, më shumë se me punët konkrete, është marrë me demagogji. Gjilani vërtet ka mbetur shumë mbrapa krahasuar me komunat e tjera dhe jemi mbrapa në shumë aspekte. Qeverisjes komunale i mungon vizioni, i mungojnë ekspertët dhe profesionistët”, shprehet ai.

Për Mersadin, vota nuk është vetëm një mbështetje politike, por një kontratë e heshtur mes qytetarit dhe pushtetit. Kur pritjet e krijuara nuk përkthehen në rezultate, besimi fillon të zbehet.

“E kanë keqpërdorur besimin e gjilanasve”

Edhe qytetari Mehmeti është kritik ndaj udhëheqjes komunale. Ai e sheh situatën përmes prizmit të zhgënjimit politik dhe thotë se qytetarët kanë pritur shumë më tepër nga pushteti aktual.

“Ky pushtet e ka keqpërdorur besimin dhe votën e gjilanasve. Keq jemi zhgënjyer dhe keq jemi tradhtuar nga këta të LVV-së. Ishin veç llafe e punë hiç, rrenca e demagogë të skajshëm”, shprehet ai.

Deklaratat e tilla pasqyrojnë një ndjenjë që është më e gjerë se një pakënaqësi për një investim të vetëm. Ato shprehin kërkesën e qytetarëve që qeverisja të matet me rezultate të prekshme dhe jo vetëm me komunikim politik.

Nga “qytet evropian” në pritje për zhvillim

Gjilani ka pasur periudha kur emri i tij lidhej me një qytet të rregulluar, me gjelbërim, jetë publike dhe një dinamizëm të dukshëm ekonomik e shoqëror. Për shumë banorë, kujtesa e këtij Gjilani është ende e gjallë.

Sot, krahasimi me të kaluarën bëhet shpesh përmes pyetjes: A po ecën qyteti me ritmin që e kërkon koha?

Kritikët e qeverisjes aktuale thonë se Gjilanit i nevojiten më shumë investime në infrastrukturë, zhvillim ekonomik, hapësira publike, rrugë, ujësjellës, kanalizim dhe projekte që lidhin qytetin me fshatrat dhe me pjesën tjetër të vendit.

Në vend të një zhvillimi të fragmentuar, qytetarët kërkojnë një strategji të integruar për Gjilanin, ku secili investim të jetë pjesë e një vizioni më të madh.

Jo të gjithë mendojnë se Gjilani ka mbetur në vend

Por tabloja nuk është krejtësisht njëngjyrëshe.

Labinoti, student nga Gjilani, ka një perceptim më optimist. Ai mendon se qyteti tashmë ka hyrë në një fazë tjetër dhe se punimet që po zhvillohen në terren janë shenjë e një ndryshimi gradual.

Sipas tij, Gjilani po fillon të lëvizë dhe investimet e tanishme duhet të shihen si pjesë e një procesi që kërkon kohë. Ai veçon veçanërisht projektin e Bulevardit, për të cilin beson se do t’i japë qytetit një pamje më moderne dhe më tërheqëse.

Ky qëndrim tregon se perceptimi qytetar nuk është uniform. Nëse për disa Gjilani është futur në një periudhë stagnimi, për të tjerë punimet që po zhvillohen janë shenjë se qyteti më në fund po hyn në një fazë të re të investimeve.

Testi i qeverisjes është terreni

Në fund, debati për Gjilanin nuk mund të zgjidhet vetëm me deklarata politike, as me kritika të opozitës dhe as me optimizëm të mbështetësve të pushtetit. Matësi më i drejtë është terreni.

Qytetari dëshiron të shohë rrugën e përfunduar, shkollën e rinovuar, kanalizimin funksional, hapësirën e gjelbër të mirëmbajtur, investimin e realizuar dhe projektin e dorëzuar në afatin e premtuar.

Sepse qytetarët, në fund të mandatit, nuk votojnë vetëm për fjalët që kanë dëgjuar, por për gjurmët që qeverisja ka lënë në qytetin e tyre.

Gjilani ka potencialin të rikthejë energjinë dhe profilin e një qyteti me peshë në Kosovën lindore. Por për këtë nevojitet më shumë se komunikim politik: nevojiten vizion, profesionalizëm, investime të mençura dhe, mbi të gjitha, rezultate.

Dhe pikërisht këtu qëndron sfida e qeverisjes komunale: ta kthejë zhurmën e deklaratave në zhurmën e punës në terren dhe premtimet në projekte të përfunduara.