Dy persona ndalohen pranë kufirit Kosovë-Serbi, Policia nis hetimet

Kamenicë – Policia ka nisur hetimet lidhur me një rast të dyshuar për kalim ilegal të kufirit, pas një informate të pranuar nga pjesëtarët e KFOR-it gjerman për një person të ndaluar pranë kufirit Kosovë-Serbi.

Rasti është raportuar më 18 gusht 2026, rreth orës 20:00, në fshatin Zajqevc të Kamenicës. Sipas Policisë, KFOR-i gjerman ka njoftuar për një person të ndaluar në afërsi të vijës kufitare, i cili ishte me një traktor.

Njësia policore ka dalë në vendin e ngjarjes dhe e ka shoqëruar të dyshuarin në stacionin policor. Gjatë deklarimit, ai ka thënë se bashkë me vëllain e tij ndodheshin në atë zonë për të prerë dru.

Pas ftesës së Policisë, në stacion është paraqitur edhe personi i dytë i dyshuar. Në konsultim me prokurorin, ndaj të dyshuarve është iniciuar rasti, ndërsa të dy janë liruar dhe do të procedohen në përputhje me procedurat e rregullta ligjore.

Autoritetet nuk kanë dhënë detaje të tjera lidhur me rrethanat e rastit dhe nëse ka pasur realisht kalim të vijës kufitare./rajonipress/