Vitia mirëpret kulturat e botës, Haliti: “Fest Folk Anamorava” urë miqësie mes popujve

Viti – Kryetari i Komunës së Vitisë, Sokol Haliti, priti sot në takim delegacionet pjesëmarrëse në Festivalin Ndërkombëtar “Fest Folk Anamorava 2026”, një nga ngjarjet e rëndësishme kulturore që po zhvillohet në Anamoravë.

Gjatë pritjes, Haliti u uroi mirëseardhje artistëve, ansambleve dhe përfaqësuesve të delegacioneve të ardhura nga vende të ndryshme, duke shprehur kënaqësinë që Vitia është nikoqire e një festivali që i kushtohet promovimit të kulturës, traditës, folklorit dhe trashëgimisë kulturore.

Në fjalën e tij, kryetari Haliti theksoi rëndësinë e festivalit në forcimin e bashkëpunimit kulturor ndërkombëtar. Sipas tij, “Fest Folk Anamorava” është shndërruar në një urë miqësie ndërmjet popujve, ku kënga, vallja dhe muzika tradicionale shërbejnë si gjuhë e përbashkët për afrimin e kulturave.

“Është kënaqësi e veçantë që Vitia sot mirëpret artistë dhe ansamble nga vende të ndryshme. Përmes folklorit dhe traditës, ne jo vetëm që prezantojmë vlerat tona kulturore, por edhe njohim kulturat e popujve të tjerë”, u shpreh Haliti.

Ai falënderoi organizatorët, grupet artistike dhe të gjitha delegacionet pjesëmarrëse për kontributin në pasurimin e jetës kulturore të Vitisë dhe Anamoravës, duke u uruar sukses në aktivitetet e festivalit.

“Mirë se vini në Viti! Mirë se vini në ‘Fest Folk Anamorava 2026’!”, ishte mesazhi i kryetarit Haliti për pjesëmarrësit e festivalit.

Festivali ndërkombëtar pritet të sjellë në Viti një atmosferë të veçantë folklorike, duke i dhënë hapësirë shkëmbimit të traditave dhe promovimit të trashëgimisë kulturore përmes muzikës, këngës dhe valleve tradicionale./rajonipress/