“Simbolika” e Vetëvendosjes

Lëvizja “Vetëvendosje” sërish është hedhur në aksion edhe kësaj here “simbolik”, duke hyrë në oborrin e Qeverisë, me ç’rast rreth 40 aktivistë të këtij subjekti kanë vendosur fletushka me mbishkrimin “Jofunksionale”, si dhe kanë shfryer gomat e rreth 55 veturave zyrtare të ministrive, që janë të vendosura në këtë ndërtesë.

Gjatë këtij aksioni është lënduar lehtë një polic, ndërsa janë arrestuar 15 aktivistë të “Vetëvendosjes”. Kjo e fundit përmes një komunikate ka thënë se jofunksionale nuk është vetëm gjendja e veturave dhe shënimi mbi to, por jofunksional do të bëhet shteti i Kosovës nëse fillon zbatimi i Marrëveshjes për “Zajednicën”.

“Ne sot duam të defunksionalizojmë qarkullimin e veturave të Qeverisë së Isa Mustafës sepse këtë Qeveri Mustafa po e përdor për ta jetësuar ‘Zajednicën’ me gjithë dëmet e rreziqet e saj për shtetin e Kosovës. Mustafa e ka vënë gjithë sistemin shtetëror në funksion të ‘Zajednicës’. Edhe Policia e gjyqësia janë bërë jashtëzakonisht efektive kur vjen puna t’i arrestojnë dhe t’i dënojnë kundërshtarët politikë”, thuhet në komunikatën e “Vetëvendosjes”./zeri/