Prokuroria Themelore në Gjilan ngre 11 aktakuza ndaj 13 personave për vepra të ndryshme penale

Gjilan – Prokuroria Themelore në Gjilan ka njoftuar se gjatë 24 orëve të fundit ka ngritur gjithsej 11 aktakuza kundër 13 personave, të dyshuar për kryerjen e veprave të ndryshme penale.

Sipas njoftimit të Prokurorisë, janë ngritur dy aktakuza kundër dy personave për veprën penale “Vjedhja e pyllit”, si dhe dy aktakuza të tjera kundër dy personave për veprën penale “Vjedhja”.

Po ashtu, një aktakuzë është ngritur kundër një personi për “Posedimi i paautorizuar i narkotikëve, substancave psikotrope ose analoge”, ndërsa një tjetër kundër një personi për “Mbajtja në pronësi, kontroll ose posedim të paautorizuar të armëve”.

Një aktakuzë është ngritur kundër një personi për veprat penale “Sulmi” dhe “Asgjësimi apo dëmtimi i pasurisë”, ndërsa dy persona janë përfshirë në një aktakuzë për veprat penale “Sulmi” dhe “Lëndimi i lehtë trupor”. Për të njëjtat vepra penale është ngritur edhe një aktakuzë tjetër kundër dy personave.

Ndërkaq, Prokuroria ka ngritur edhe një aktakuzë kundër një personi për veprën penale “Mospërfillja e gjykatës”, si dhe një aktakuzë kundër një personi për veprën penale “Rrezikimi i trafikut publik”.

Prokuroria Themelore në Gjilan nuk ka bërë të ditur identitetin e të akuzuarve, ndërsa procedurat ndaj tyre do të vazhdojnë në gjykatat kompetente, në përputhje me legjislacionin në fuqi./rajonipress/