“EKZISTENCA 4” rikthen mërgatën artistike në Gjilan – arti bashkëkohor dialog mes identitetit, kujtesës dhe kohës

Gjilan – Galeria e Arteve në Gjilan është shndërruar në një hapësirë të reflektimit estetik dhe dialogut kulturor me hapjen e edicionit të katërt të ekspozitës kolektive “EKZISTENCA 4”, një projekt artistik që bashkon krijues shqiptarë nga mërgata dhe i sjell ata më pranë publikut vendor përmes gjuhës universale të artit bashkëkohor.

E kuruar me vizion artistik nga Jyksel Gjinolli – Sylejmani, ekspozita prezanton krijimtarinë e tetë artistëve të njohur: Avdi Hajdari-Kame, Burbuqe Osmani Jaha, Driton Hajredini, Eshref Berisha, Florim Hasani, Kushtrim Sylejmani, Shuk Orani dhe Visar Kryeziu, të cilët përmes mediumeve dhe qasjeve të ndryshme artistike ndërtojnë një rrëfim të fuqishëm mbi ekzistencën njerëzore, identitetin, kujtesën kolektive, kohën dhe sfidat e realitetit bashkëkohor.

Çdo vepër e ekspozuar përfaqëson një këndvështrim unik estetik, duke dëshmuar se arti mbetet ura më e fortë që lidh krijuesit me vendlindjen, pavarësisht distancave gjeografike. Në këtë aspekt, “EKZISTENCA 4” nuk është vetëm një ekspozitë, por edhe një platformë që promovon dialogun kulturor ndërmjet diasporës artistike dhe publikut në Kosovë.

Në ceremoninë e hapjes morën pjesë zyrtari i Galerisë së Arteve në Gjilan, Din Azizi, si dhe drejtori për Kulturë, Rini dhe Sport, Kushtrim Zeqiri, i cili theksoi se kjo ekspozitë përfaqëson një vlerë të rëndësishme për jetën kulturore të qytetit dhe se Komuna e Gjilanit do të vazhdojë ta mbështesë këtë projekt edhe në edicionet e ardhshme, me synim fuqizimin e lidhjeve ndërmjet artistëve shqiptarë që jetojnë jashtë vendit dhe skenës kulturore vendore.

Nga ana tjetër, kuratorja Jyksel Gjinolli – Sylejmani shprehu mirënjohjen për mbështetjen institucionale të Drejtorisë për Kulturë, Rini dhe Sport dhe Komunës së Gjilanit, duke vlerësuar se bashkëpunimi institucional është një shtyllë e rëndësishme për promovimin e artit bashkëkohor dhe krijimin e hapësirave të reja për artistët shqiptarë.

Ekspozita “EKZISTENCA 4” do të mbetet e hapur për vizitorët në Galerinë e Arteve në Gjilan edhe në ditët në vijim, duke u ofruar adhuruesve të artit mundësinë të njihen nga afër me një koleksion veprash që ndërthurin ndjeshmërinë estetike, reflektimin filozofik dhe identitetin kulturor në një përvojë të veçantë artistike./rajonipress/