Haliti dhe Cana dakordohen për thellimin e bashkëpunimit, Vitisë i hapet rruga drejt Poliklinikës Specialistike dhe QKMF-së së re
RajoniPress
14:56, 28 Korrik, 2026
| 2 orë më parë
Viti – Thellimi i bashkëpunimit ndërinstitucional në sektorin e shëndetësisë dhe avancimi i shërbimeve për qytetarët ishin në qendër të takimit që kryetari i Komunës së Vitisë, Sokol Haliti, zhvilloi me drejtorin e Spitalit të Përgjithshëm të Gjilanit, Dr. Afrim Cana.
Në takim, ku morën pjesë edhe drejtori për Shëndetësi dhe Mirëqenie Sociale, Halil Musliu, drejtoresha e Qendrës Kryesore të Mjekësisë Familjare në Viti, Dr. Vjollca Kadolli-Halili, si dhe zyrtari i Spitalit të Përgjithshëm të Gjilanit, Kudret Rexhepi, u diskutuan projektet strategjike që synojnë përmirësimin e kujdesit shëndetësor në komunë.
Një nga temat kryesore ishte funksionalizimi i Poliklinikave Specialistike, projekt i Ministrisë së Shëndetësisë, nga i cili përfiton edhe Komuna e Vitisë. Bashkëbiseduesit vlerësuan se ky projekt do të ndikojë drejtpërdrejt në rritjen e qasjes së qytetarëve në shërbime specialistike, duke zvogëluar nevojën për trajtim jashtë komunës.
Po ashtu, vëmendje e veçantë iu kushtua projektit për ndërtimin e objektit të ri të Qendrës Kryesore të Mjekësisë Familjare (QKMF) në Viti, investim i planifikuar nga Ministria e Shëndetësisë për vitin 2027. Në këtë kuadër u shqyrtua mundësia që, pas funksionalizimit të objektit të ri, godina ekzistuese e QKMF-së të transformohet në Poliklinikë Specialistike, duke zgjeruar gamën e shërbimeve mjekësore që do të ofrohen për qytetarët.
Gjatë takimit u diskutua edhe për procesin e decentralizimit të shërbimeve shëndetësore, me synimin që kujdesi specialistik të jetë sa më afër nevojave të qytetarëve dhe të rritet efikasiteti i sistemit shëndetësor.
Përfaqësuesit e institucioneve u pajtuan se bashkëpunimi i vazhdueshëm ndërmjet Komunës së Vitisë dhe Spitalit të Përgjithshëm të Gjilanit përbën një faktor kyç për ngritjen e cilësisë së shërbimeve shëndetësore dhe krijimin e një sistemi më funksional, më të qasshëm dhe më cilësor në shërbim të qytetarëve./rajonipress/
