Viola Abazi, krenaria e Gjilanit – e para në listën e regjistrimit në Gjuhë dhe Letërsi Angleze

Gjilan – Me një rezultat të shkëlqyer dhe numrin më të madh të pikëve në konkursin e regjistrimit, Viola Abazi është renditur e para në listën e pranimeve në Departamentin e Gjuhës dhe Letërsisë Angleze, duke dëshmuar se suksesi është fryt i përkushtimit, disiplinës dhe punës së vazhdueshme.

E diplomuar nga Gjimnazi Natyror “Xhavit Ahmeti” në Gjilan, Viola ka spikatur gjatë gjithë rrugëtimit të saj arsimor për kulturën e gjerë, zgjuarsinë dhe seriozitetin në mësime. Formimi i saj është pasuruar edhe më tej përmes ndjekjes me sukses të të gjitha kurseve në British School, ku ka ndërtuar një bazë të fortë akademike në gjuhën angleze.

Arritja e saj është pritur me krenari nga familja, e cila e ka mbështetur në çdo hap të rrugëtimit të saj. Ky sukses ka një domethënie të veçantë edhe për kujtimin e gjyshit të saj tashmë të ndjerë, Ragip Abazi, ish-kryesindikalist dhe një personalitet i respektuar për kontributin e tij në mbrojtjen e të drejtave të punëtorëve. Vlerat e punës, ndershmërisë dhe përkushtimit që ai përcolli ndër breza pasqyrohen sot edhe në suksesin e mbesës së tij.

Rezultati i Viola Abazit përfaqëson më shumë se një arritje personale; ai është dëshmi se investimi në dije, edukimi cilësor dhe mbështetja familjare krijojnë themele të forta për brezin e ri. Me potencialin dhe seriozitetin që e karakterizojnë, ajo pritet të jetë një emër premtues në fushën e gjuhësisë dhe arsimit, duke e nisur rrugëtimin universitar me një sukses që e bën krenar jo vetëm familjen e saj, por edhe qytetin e Gjilanit./rajonipress/