Marrëveshjet u bënë, hasmëritë mbeten

Autoritetet e Prishtinës dhe të Beogradit kanë negociuar për katër vjet në Bruksel dhe kanë nënshkruar rreth 25 marrëveshje, por nuk kanë arritur t’i pajtojnë dy popujt me urrejtjen më të madhe në Ballkan.

Madje, sipas opozitës dhe analistëve, marrëveshjet, sidomos këto të fundit, kanë thelluar edhe më shumë hendekun ndërmjet dy shteteve.

Ky fakt pranohet edhe nga drejtuesit e Qeverisë, megjithatë ata thonë se dialogu është e vetmja rrugë për normalizimin e dy shteteve.

Subjektet politike opozitare shprehen të pakënaqura me katër marrëveshjet e nënshkruara më 25 gusht, në Bruksel, dhe deklarojnë se “pajtimi nuk bëhet në këtë formë, duke e dëmtuar Kosovën”.

Sipas tyre, është e pakuptimtë se si Qeveria e Kosovës po krenohet me Marrëveshjen për Largimin e Barrikadës mbi Urën e Lumit Ibër, përderisa me Marrëveshjen për Themelimin e Asociacionit të Komunave me shumicë serbe Kosovës po i garantohet një e ardhme e errët./zeri/