Zyrtarët me shumë vende pune

Shteti si pronë e një grupi të vogël njerëzish. Qytetarët sillen të papunë rrugëve, zyrtarët zaptojnë nga dy-tri vende pune.

“Këtu përgjegjës kryesor është Isa Mustafa, sepse ai është kryeministër dhe, edhe pse nuk kam të dhëna të sakta, është ai i cili merr paga suplementare nga universiteti, e tjera e tjera, që është absolutisht në kundërshtim me parimet kushtetuese, me përgjegjësinë morale e politike”, ka thënë Smaka

Zyrtarët shtetërorë, të cilët kryejnë funksione të larta duke filluar nga kryeministri, ministrat, kryetari i Parlamentit, deputetët, drejtorët e agjencive të ndryshme e të tjerë, duket sikur nuk u mjafton puna që bëjnë në shërbim të shtetit, por mendojnë se janë të zot për të kryer edhe punë të tjera, të cilat edhe i bëjnë.

Mirëpo, pavarësisht se kryejnë punë dytësore ose ndoshta edhe më shumë, pagat që marrin vijnë nga buxheti i shtetit, dhe këta zyrtarë nuk mjaftohen me pagën e parë bazë, e cila dihet se për një funksion të tillë është tejet e lartë, por ata duan që edhe pagën tjetër ta marrin të gjithën, pa menduar se po e dëmtojnë edhe më shumë buxhetin e shtetit.

Mirëpo, sipas analistëve të politikës, si dhe njohësve të çështjeve juridike një gjë e tillë duhet të stopohet duke u krijuar një ligj, i cili do t’ua mundësonte të merrnin vetëm 25 për qind nga paga bazë./kosova sot/