Qeveria “Mustafa” me 28 zëvendësministra

Qeverisë “Mustafa” i janë shtuar emrat e 10 zëvendësministrave të rinj, duke e ngritur në 28 në total numrin e tyre. Numër ky i cili, sipas përfaqësuesve të ekzekutivit të vendit, do të jetë përfundimtar, megjithëse me marrëveshjen për bashkëqeverisje parashihej që Qeveria e Kosovës të kishte rreth 50 zëvendësministra. Megjithatë, për partitë opozitare dhe përfaqësuesit e shoqërisë civile ekzekutivi i vendit nuk ka nevojë për 28 zëvendësministra.

Ministria e Shëndetësisë do të ketë më së shumti zëvendësministra, gjithsej tre, ndërsa me nga dy zëvendësministra janë tetë ministri: Ministria e FSK-së, Ministria e Administratës Publike, Ministria e Punës dhe Mirëqenies Sociale, Ministria e Kulturës, Rinisë dhe Sportit, Ministria e Financave, Ministria e Mjedisit dhe Planifikimit Hapësinor, Ministria për Kthim dhe Komunitete, Ministria e Zhvillimit Ekonomik. Me nga një zëvendësministër do të jenë nëntë ministri, ndërkohë që në bazë të kësaj liste pa zëvendësministër do të jetë Ministria e Punëve të Brendshme.

Zëdhënësi i Qeverisë së Kosovës, Arban Abrashi, ka thënë për “Zërin” se kjo është lista përfundimtare e emërimeve të zëvendësministrave. “Kjo është lista përfundimtare e emërimeve”, ka thënë shkurt Abrashi./zeri/