Figliuolo: Kosova nuk është imune ndaj terrorizmit

Komandanti i KFOR-it, gjeneralmajori Francesco Paolo Figliuolo, ka thënë se terrorizmi është një problem global nga i cili nuk është imune as Kosova, ashtu siç tha ai nuk është asnjë vend tjetër në botë.

Megjithatë, ai ka thënë se institucionet e sigurisë në Kosovë po bëjnë çdo gjë që është e mundur që ta luftojnë ekstremizmin e dhunshëm dhe terrorizmin.

Figliuolo ka thënë se Ligji që ndalon Pjesëmarrjen në Luftëra dhe Shkëmbimi i Informacioneve mes institucioneve përkatëse në këtë çështje, janë mënyrat më të mira për ta luftuar terrorizmin.

Këto deklarata i pari i KFOR-it i ka dhënë në një konferencë për medie, në të cilën ka paralajmëruar përfundimin e mandatit të tij në Kosovë.

Komandanti i KFOR-it ka thënë se institucionet e sigurisë në Kosovë po tregojnë një përkushtim dhe profesionalizëm të madh karshi kërcënimeve për sulmet terroriste. Megjithatë, ai ka ritheksuar se duhet të bëhet ende më shumë në këtë aspekt.