Sytë e yjeve të kaltër

Poezi nga Avdush Canaj

Nuk ka rëndësi
pse zogu i kopshtit
luhatet në luhare të verës.

Nuk ka rëndësi
pse dikush i bie violinës
e lulëkuqja vallëzon
me kallinjtë në arë.

Fare nuk ka rëndësi,
ama hiç
pse një gjeth fluturon qiellit
ta shoh si pikturon reja e bardhë.

S’është me rëndësi
pse ngutet era
t’i vë në gjumë lulet
me fizarmonikën e barit.

Me rëndësi është,
shumë me rëndësi,
unë kam një flutur
që s’ma lëshon dorën
e më thotë:
Ke sytë e yjeve të kaltër