Gjilani shpërndan 320 pako ushqimore për familjet në nevojë

Gjilan – Qendra për Punë Sociale në Gjilan në bashkëpunim me donatorët ka shpërndarë sot 320 pako ushqimore për familjet në nevojë, për ta kaluar sa më mirë festën e Fitër Bajramit.

Në shpërndarjen e pakove ushqimore, të cilat përmbajnë gjërat elementare ushqimore, ka marrë pjesë edhe drejtori i QPS-së, Mursel Zymberi, i cili ka informuar se 150 pako i ka dhënë donacion organizata “Islamik Relief of Kosova” dhe 170 të tjera një bashkatdhetar që jeton në Zvicër.

Zymberi tha se QPS ka punuar që t’i sigurojë donacionet, ndërsa tha se janë përzgjedhur familjet me gjendje të rëndë sociale si përfitues të këtyre pakove./rajonipress/