​Veseli: Kushtetuta, më shumë se akt juridik, është simbol shtetësie

Nëpërmjet një komunikate dërguar mediave, kryetari i Kuvendit, Kadri Veseli, ka uruar sot të gjithë qytetarët e Republikës së Kosovës, për Ditën e Kushtetutës, që shënon edhe 8-vjetorin e miratimit të saj nga Kuvendi.

“Gëzuar Dita e Kushtetutës! Kushtetuta, për ne, qytetarët e Republikës së Kosovës, është më shumë se akt juridik. Është simbol unik i shtetësisë dhe synimeve tona shekullore për shtet. Në vete ajo përmban thellësisht mundësitë tona për sovranitet, integritet dhe barazi, duke pasqyruar sakrificat për themelimin e shtetit, promovimin e vlerave demokratike si dhe funksionimin e baraspeshuar të pushteteve”, thuhet në urimin e Veselit.

Sipas Veselit, Kosovës më shumë se kurrë, sot, i duhen energji të shtuara që ta jetësojë Kushtetutën tonë, ta bëjë dinamike dhe ta bëj frymëzim për çdo qytetar.