Sot vranët dhe me shi, nga e enjtja rënie e temperaturave

Instituti Hidrometeorologjik i Kosovës bën të ditur se vendi të mërkurën do të jetë nën ndikimin e fushave të presionit në rënie, duke favorizuar zhvillim të vranësirave të dendura.

IHK njofton se parashihet mot kryesisht i vranët me mundësi për riga të dobëta dhe lokale shiu.

Parametrat termikë do të mbesin relativisht stabilë, ndërsa fusha barike do të shënojë rënie graduale.

Era do të fryjë nga jugperëndimi, me shpejtësi 1–9m/s.

Temperaturat minimale pritet të luhaten ndërmjet -1°C deri 7°C, ndërsa maksimalet ditore do të arrijnë vlera prej 8°C deri 11°C.

Të mërkurën priten vlerat më të larta termike të javës, ndërsa ditët pasuese do të karakterizohen nga fusha termike më të ulëta, tipike dimërore. /Telegrafi/