Bunjaki nuk flet për Behramin dhe Shaqirin

Albert Bunjaki nuk dëshiron të flas për komentet e fundit të Valon Behramit dhe Xherdan Shaqirit, të cilët thanë se nuk do të luajnë për Kosovën.Dy futbollistët kosovar e që luajnë për përfaqësuesen e Zvicrës, Valon Behrami dhe Xherdan Shaqiri kanë deklaruar se nuk do të kthehen të luajnë për Kosovën as pas pranimit në EUFA dhe FIFA.

Behrami tha se është shumë i vjetër për të luajtur për Kosovën, ndërsa Xherdan Shaqiri insistoi se është i lumtur te kombëtarja e Zvicrës.

Këto deklarata i ka lexuar edhe përzgjedhësi i Kosovës, Albert Bunjaki, i cili insiston se nuk është momenti i duhur për të folur për futbollistët shqiptarë që luajnë te Zvicra.

“Mendoj që nuk është koha të hymë në tema të tilla. Unë e di se ka shumë spekulime të cilat kanë qëllime të ndryshme. Thjeshtë duhet t’ia lëmë kohës”, tha Bunjaki për Gazetën Express.

Kujtojmë se Kosova tashmë ka arritur të marrë disa lojtarë që kërkohen nga kombëtare tjera si Loret Sadiku apo Bersant Celina, i cili tashmë ka debutuar edhe për ekipin e parë të Manchester Cityt. /Express