D’Alema: Lufta e Kosovës ishte një përvojë dramatike

Është një nga politikanët më të njohur në 25 vitet e fundit në Itali, njëri prej atyre që i mbijetoi “rrëzimit të politikës së vjetër” nga “politika e re” pas të famshmit “Tangentopoli” në Itali.

Massimo D’Alema, kryeministër i Italisë në një periudhë shumë të rëndësishme për shqiptarët, në kohën e bombardimeve të NATO-s mbi atë që kish mbetur nga ish-Jugosllavia për shkak të luftës në Kosovë.

I përket së majtës evropiane dhe në atë kohë si kryeministër doli kundër qëndrimit të partisë së tij duke mbështetur bombardimet mbi Beograd dhe në zonat ku ishte ushtria jugosllave.

Në emisionin “Top Story” në televizionin Top Channel, D’Alema ka thënë se Lufta e Kosovës ishte një përvojë dramatike edhe pse sipas tij, është një përgjegjësi e madhe ajo për të vendosur për bombardimet, për të shkaktuar viktima, në mënyrë të pashmangshme dhe të pafajshme.

“Ishte një vendim i dhimbshëm për mua, por që e konsiderova të pashmangshëm sepse për mua pati shumë rëndësi përvoja që kalova duke ardhur në mars në Shqipëri, shkova në kufi në Kosovë, në pikën ku vinin refugjatët dhe duhet të them që pamja që pashë, e familjeve, njerëz të plagosur më goditi shumë dhe më bëri të kuptoj që ajo po ndodhte ishte një pastrim etnik i Kosovës dhe në atë moment u binda që duhej të vepronim”.

“Shqipëria ishte një partner i ynë i natyrshëm edhe për të përballuar pasojat e luftës. Pasoja e parë, që ishte e parashikueshme qe ikja nga Kosova e të paktën 300 mijë refugjatëve dhe një pjesë e tyre u ndihmuan nga Shqipëria me ndihmën italiane. Është e qartë që në ato ditë patëm një marrëdhënie të vazhdueshme”, ka deklaruar D’Alema.

Ai shtoi se partia e tij ishte pro ndërhyrjes.

“Ne ishim aleatë me ekstremin e së majtës, me komunistët. Ata ishin kundër kësaj, ndërsa partia ime e mbështeti. Shumica e qeverisë e mbështeste, por edhe opozita, pra Berlusconi votoi pro ndërhyrjes ushtarake të NATO-s. Pati një përputhje në nivel kombëtar, njëzëri. Partia ime ishte partia kryesore në qeveri në atë kohë. Nuk do të veproja dot duke patur kundër shumicën e parlamentit dhe të qeverisë”, ka thënë ish-kryeministri i Italisë.