Kurti: Le të festojmë e të anojmë kah e drejta, e mira dhe e vërteta
RajoniPress
09:46, 4 Qershor, 2019
Kreu i Vetëvendosjes, Albin Kurti ka uruar festën e Fitër Bajramit.
Përmes një postimi në Facebook, Kurti ka shkruar se duhet anuar kah e drejta, kah e mira, kah e vërteta, kah e mbara, kah e bukura.
Postimi i plotë:
Pas agjërimit të përditshëm në Ramazan dhe bashkimit të rregullt për Iftar erdhi festa e përbashkët e Fitër Bajramit. Urime e me gëzime!
Vetëpërmbajtja individuale përgjatë një muaji, sakrifica vetëmohuese e kalitja shpirtërore vazhdohen me shumë solidaritet për ata që kanë më pak. Festa është e të gjithëve kur është për të gjithë.
Me dashuri rreth sofrës së përbashkët, plot shpresë në zemra që agjërimi të jetë i pranuar, e me dorën e zgjatur të përkrahjes për të varfërit me fat Fitër Bajramin!
Sivjet dhe sot, Fitër Bajrami përputhet me ditëlindjen e Mulla Idriz Gjilanit i cili e shkriu jetën e vet për leximin dhe mësimin, për shkollimin e brezave, derisa ra dëshmor në betejë për liri e për bashkim kombëtar këtu e 70 vjet më parë.
Le të festojmë sepse le të anojmë kah e drejta, kah e mira, kah e vërteta, kah e mbara, kah e bukura.
