Shaqiri kujton ndeshjen ndaj Serbisë

Ndeshja më interesante e Kampionatit Botëror për shqiptarët mbetet ajo mes Zvicrës dhe Serbisë, ku ‘helvetikët’ fituan me rezultat 2-1.

Autori i golit të fitores në atë ndeshje, Xherdan Shaqiri ka bërë një postim në ‘InstaStory’ duke kujtuar këtë moment magjik.

Ndeshja ishte mjaft e tensionuar, duke ditur që në fushë luanin edhe dy shqiptarë nga Kosova, përveç Xherdan Shaqirit, edhe Granit Xhaka e Valon Behrami, shkruan kk, përcjell albinfo.ch.

Fillimisht, Serbia kaloi në epërsi me golin e shënuar nga Mitroviç. Por goli i motivoi shqiptarët e Zvicrës për të bërë një rikthim sensacional.

Së pari, Granit Xhaka me një perlë dhe më pas Xherdan Shaqiri i dhuruan zviceranëve kalimin nga faza e grupeve.

Por ajo çka irritoi më shumë serbët ishte festimi i golave nga dyshja e lartpërmendur. Ata vendosën ta bënin simbolin e shqiponjës gjatë festës së golave, çka rriti tensionet brenda dhe jashtë fushave.