Haradinaj: Amerika flet vetë, as unë as Thaçi nuk jemi zëdhënës të saj!

Gjatë mbrëmjes së kaluar, presidenti i vendit, Hashim Thaçi ka ripërsëritur qëndrimin e tij sa i përket taksës 100% ndaj produkteve serbe.

Thaçi deklaroi se taksa duhet të hiqet, në mënyrë që të fuqizohet partneriteti strategjik me Shtetet e Bashkuara të Amerikës.

“Si president i vendit ftoj që të shqyrtohen të gjitha mundësitë për pezullimin e taksës, në mënyrë që të fuqizojmë partneritetin strategjik me SHBA-në. Duhet t’i marrim shumë seriozisht, ata që mendojnë t’i injorojnë këto këshilla, janë gabim,. Askush nuk mund të dalë mbi pozicionin strategjik të Kosovës”, ka thënë ai.

Tutje Thaçi tha se nuk ka lider që mund ta cenojë miqësinë e ShBA-ve me popullin e Kosovës dhe se pushtetet janë të ndara.

E për këto deklarata të Thaçit, Haradinaj tha se Amerika mund të flasë vetë dhe se as presidenti dhe askush tjetër nuk është zëdhënës si Amerikës.

“Amerika flet vetë, as presidenti as unë as askush nuk është zëdhënës i Amerikës nuk kanë nevojë askush të flasë për ta, ata flasin vetë dinë të falsin i shpjegojnë gjanat”, ka përfunduar Haradinaj./Indeksonline/