Ambasadori amerikan ‘kritikon’ Kuvendin e Kosovës

Ambasadori amerikan, Greg Delawie, thotë se pajtohet me shefen e Zyrës së Bashkimit Evropian në Kosovë, Natalya Apostolova, e cila bëri kritika të ashpra në adresë të Kuvendit për mosfunksionimin e tij edhe pas konstituimit.

Ambasadori Delawie është i një mendjeje me shefen e Zyrës së BE-së se Kuvendi duhet të nisë punën sa më shpejt që është e mundur.

“Pajtohem me Natalya Apostolova-n që Kuvendi duhet të nisë punën sa më shpejt që është e mundur dhe t’u shërbejë qytetarëve. Probleme serioze duhet të zgjidhen tani”, ka shkruar Delawie në Twitter.

Apostolava tha se është tejet e shqetësuar për mosfunksionimin e Kuvendit dhe mosbajtjen e asnjë mbledhjeje të Kryesisë, duke shtuar se nuk është arsyetim fakti që akoma nuk janë kompletuar komisionet me kryetarë dhe anëtarë, sepse, sipas saj, kjo është dashur të kryhej deri më tani.

Lidhur me mosfunksionimin e legjislativit, shefja e BE-së tha se këtë shqetësim do t’ia shpreh edhe kreut të Kuvendit, Kadri Veseli. /Express/