Kurteshi: Kryetari i Gjilanit e punësoi bashkëshorten pa konkurs

Gjilan – Kryetari i Qendrës së Lëvizjes Vetëvendosje në Gjilan, Ismajl Kurteshi, kritikoi kryetarin e komunës për nepotizmin në punësim, si në sektorin publik, ashtu edhe në atë privat.

Sipas Kurteshit kryetari i Komunës, Qemajl Mustafa, e ka punësuar bashkëshorten e tij në Drejtorinë e Arsimit pa konkurs, duke i shkelur të gjitha procedurat e parapara me ligj. Sipas nenit 8, të kreut të dytë, të Ligjit të Punës nr. 03/L – 212 : Punëdhënësi në sektorin publik, është i obliguar që të shpall konkurs publik sa herë që pranon në punë një punëkërkues… As kjo normë ligjore, e as kriteret dhe procedurat ekzistuese për punësim nuk vlejnë për Kryetarin e Komunës së Gjilanit, i cili është i njohur si kampion i shkeljeve në fushën e punësimit, por jo vetëm në këtë fushë”, u shpreh Kurteshi.

Ai shtoi se në muajin gusht të vitit 2011, për shkak të tejkalimit të numrit të të punësuarve, rrogat e shërbyesve civil u vonuan një javë. “Kryetari Qemajl Mustafa ka krijuar kategori të jashtëligjshme të të punësuarve si “Lista e Kryetarit”, “Vullnetarët” etj., ku vetëm në fund të vitit të kaluar i kishte larguar nga puna mbi 60 të punësuar, pa procedurë, ashtu edhe siç i kishte punësuar me SMS, madje edhe me urdhëresa me shkrim e me gojë. Në fillim të këtij viti ai kishte pranuar se i ka punësuar rreth 25 të punësuar pa konkurs dhe pa asnjë procedurë e asnjë kriter”, tha ndër të tjera Kurteshi.

Këto punësime të paligjshme nuk bëhen për nevoja të Komunës, por për përfitime politike të Kryetarit të Komunës dhe rahatinë e anëtarëve të familjes, miqve e shokëve të tij. Përkundër faktit që Gjykata e ka konstatuar shkeljen nga ana e Komunës, edhe më tutje po tolerohen dhe nuk po merren masa ndaj përgjegjësve për këto shkelje.

Në këtë konferencë u fol edhe për borxhet që ua ka Komuna shumë të punësuarve, të cilët nuk ka arritur t’i fus në listën e pagave, edhe pse mjete për pagesë i ka marrë edhe nga mjetet e dedikuara për investime kapitale./rajonipress/