Mungojnë ofertuesit, shtyhet ankandi për “Kualitetin”

Gjilan – Naser Maliqi gjykatës nga departamenti i përgjithshëm-divizioni civil tha se në mungesë të ofertuesve seanca tjetër caktohet për datën 22 prill. Përfaqësuesi i Raifessen Bankës ka kërkuar që ankandi mos të caktohet derisa të merr vendim Gjykata e Apelit.

Ashtu edhe siç ishte paralajmëruar të martën në prani të palëve në Gjykatën Themelore në Gjilan në departamentin e përgjithshëm – divizioni civil të cilin e udhëheq gjykatësi Naser Maliqi është shqyrtuar ankandi publik për shitjen e fabrikës së bukës “Kualiteti” pronë e Sylejman Deshishkut nga Podujeva.

Gjykatësi Maliqi pasi ka dëgjuar palët kontestimore Raifeissen Bank, NLB dhe përfaqësuesit e “Kualitetit” tha se seanca duhet të caktohet për datën 22 prill sepse ka mungesë të ofertuesve. “Në mungesë të ofertuesit seancën po e shtyjmë për datën 22 prill” tha Maliqi.

Përfaqësuesi i Raifeissen Bankës ka dhënë vërejtje meqë sipas tij ankandi nuk duhet të caktohet tutje derisa nuk merr vendim Gjykata e Apelit. Vërejtje ka dhënë edhe përfaqësuesi i NLB-së ku Sylejman Deshishku ka marrë kredi edhe nga kjo bankë edhe nga Raifeissen Bank.

Megjithatë gjykatësi Naser Maliqi tha se ka kohë të mjaftueshme që edhe Gjykata e Apelit të vendos deri në datën e caktuar për seancën e radhës.

Ndryshe Gjykata Themelore në Gjilan ka sjell vendim që ta shes paluejtshmërinë e hipotekuar pronë e Sylejman Deshishkut në të cilën pronë është ndërtuar fabrika e bukës “Kualiteti. Kjo pasuri pritet të shitet në ankand publik më 26 shkurt kurse vlera e saj është mbi 5 milion euro. “Kualiteti” është qitur në ankand publik për shkak të borxheve.

Sipas vendimit të Gjykatës Themelore pasuria e “Kualitetit” do të shitet në ankand publik me qëllim të sigurimit të mjeteve për të përmbushur obligimet e firmës FBM “Kualiteti” të cilën e përfaqëson Sylejman Deshishku. Sipas vendimit vlera e Kualitetit arrin në 5.078.090 euro , por kjo paluejtshmëri mund të shitet edhe nën vlerën e përcaktua, r por jo më lirë se ½ e kësaj vlere. /rajonipress/